Äs isch dä Wahnsinn du wirsch hüt bereits 3 Johr alt. Ich han s'gfühl du bisch erst gad uf Welt cho, din Start is Läbä isch recht turbulent für alli gsi. Ich weiss no wiä hüt wo dich diä Krankäschwösterä wiä wild is Füessli gstochä händ i dä Hoffnig das äs chlisäs Tröpli Bluet chunt, für mich isch das dä Horror gsi, so churz uf dä Welt und denn wird mä gad so plogät. Langi Zit hani denn am vieri Fiirobig gmacht und bin denn zu dir und zu dim Mami in Spitol cho uf Züri. Froh simmer denn gsi wo mir dich endlich hend dörfä dihai begrüessä. Ab denn isch Zit verflogä wiä im Flug du bisch äs chlises süesses Baby gsi, fascht niä brühelät und eigentlich immer zfridä. Mit dä neuä Magäsondä sind denn au gad di erstä Zähli cho und vo döt ah häsch dütlich meh brühlet wiä vorher, ich weiss das äs dich würkli plogäd diä blödä zähli und vorallem chasch diä Siächä nid mol bruchä. Mengs Stundä simmer i dä Nacht binänand glägä und du häsch mich ahbrühelät und nid wellä pfusä. Mengmol häts denn Situationä geh wo dä Schmerz noloh hät und denn uf zmol ä verschmizzzts Lächlä vo dir cho isch und ich mich zwar uf die eint Sitä mega gfreut han, aber uf di ander sitä dich Frechdachs het chönä ah Wand anäklätschä :-). Ich weiss du chasch jo nünt däfür, aber mini Nervä werdäd doch scho öppä recht strapeziert, aber äbä sobalds dir wieder besser got wird sofort wieder glachät und gluchset wiä än Mariächäfer mis Herzli got jedes mol vo neuem uf.
Vielmol wenn ich anderi Maitli i dim alter gseh wird ich unendlich trurig und äs verrisst fascht mis Herzli, was diä alles mached und diä alles dörfed entdeckä isch unglaublich. Du uf di ander Sitä muesch alles bis ufs chlinschte erkämpfä mit mengmol meh und mengmol weniger Erfolg. Vieles aber wirsch du niä chönä und niä dörfä erläbä. Das isch für mich als din Papi mengmol nur sehr schwer zerträgä.
Ich möcht mich no bi dir entschuldiä. I dä Feriä simmer uf die gröscht Dünä vo Europa, am Fuess vo dä Dünä hend mir denn entschiedä das Mia mit äm Mami dunä blibt und mir anderä händ üs uf dä Weg zum Gipfel gmacht. Dobä ahcho han ich all diä Chind gseh uf dem riesä Sandhufä spielä und ich het mich chönä in Arsch bissä das ich dich nid eifach packt und uf dä Hügel ufätreit han. Im nochhinein han ich mir viel Gedankä drüber gmacht und äs isch mir ufgfallä, dass mir bis jetzt i dänä drü Johr wo du uf dä Welt bisch, noniä zögerät händ zum dich irgend woanä mitneh.
Ich versprech dir hüt und jetzt das da niämeh wird vorcho, wenns muess sie wird ich dich uf die höchstä Bergä trägä wos git uf därä Welt. Ich will dich mit all minerä Kraft dur dis ganze Läbä trägä, öbs ufä oder abä got, ob Sunnä schint oder öbs regnet.
Liebs Müsli ich bin so stolz uf dich, wiä du diis Läbä trotz all denä Umständ meisterisch isch eifach sensationell. Du chasch dich über di chlinstä Sachä erfreuä wiä über ä Goldmedallie. Viel anderi Lüt söttäd dich als Vorbild neh.
Happy Birthday mis Schätzeli
Din stolzä und dich über alles liebendi Papi
PS: Das isch min erstä Ihtrag im Blog. Ich wots nid unterloh üsem Umfeld äs grosses grosses DANKÄ ussprechä. Minä Elterä für dä wüchetlich Hüetidienst Mia und au dä Yves got sehr sehr gern i Grüenegg, üsnä Hüeti Ladys (Nadine W, Nadine U, Melä, Jeanine und dä Mimi) für diä unzähligä und unbezahlbarä Hüetistundä und allne andere wo üs immer wieder unterstützed. All üsnä Fründä wo Mia so nämäd wiä sie isch und kei Hemmigä händ zum sie uf dä Arm neh oder au mol Seich mit ihrä zmachä. DANKÄ DANKÄ VIEL VIEL MOL.
Dä letsch Dank got as Evi, für all dini Geduld und Liebi für Mia, ich chönt mir ka besseri Frau und kei bessers Mami für üsi Kind wünschä. Merci.
Keine Kommentare:
Kommentar veröffentlichen