Etzdenn vor fasch zweiehalb Johr, het mich Dis Mami und Din Papi zum Pizza-Esse im Rabe ihglade. Noch de sehr feine Pizza han ich es Briefli vo Dine Eltere übercho, zersch han ich gmeint es isch e verspöhtets Geburtstagsgschenk. Es isch viel schöner cho. I dem herzige Briefli isch sehr süess gschriebe gsi ob ich de Götti vom zuekünftige „Tüüfeli“ oder „Engeli„ wot werde. Voller Überraschig han ich de wichtigst Satz nomol müesse lese. Mit sonere ehrevolle Frog hani bim beste Wille nid grechnet, zumal ich gar nüm so genau weiss ob ich do scho gwüsst han, dass Du underwegs bisch. Uf jede Fall han ich kei Sekunde müesse überlege ob ich Din Götti wot werde. Natürlich isch mir do scho bewusst gsi das Du es Engeli wirsch.
Zirka vier Monet spöter hend mir Dis Mami und Din Papi mitteilt, das mit Dir nid alles in Ordnig isch. Ich ha natürlich ghofft, dass das alles halb so schlimm wird si. Etz, zwei Johr später chani sägä: Mia Du bisch en ganz bsundere Sunneschii.
Am Ahfang vo Dim Lebe, hesch Du leider ganz lang im Spitol in Züri müesse bliibe. Dank enere „Spezial - Bewilligung“ het Din Götti au usserhalb vo de Bsuechsziite bi Dir dörfe go inneluege (Danke Mami und Papi). Bi dene Bsuech han ich Dich dörfe in Arm neh, mit Dir umelaufe, Tagesgschichtli verzelle, schwierigi Wörter zitiere (ha s’gfühl gha denn hesch immer am ufmerksamste zueglossed), eifach nu det sitze und jo sogar schöppele. Obwohl mir lieber gsi wär, Du hetsch Dihei i Dim eigete Bettli chöne ihpfusse, han ich die Stunde am Obig mit Dir gnosse. Du hesch mir au bewusst gmacht, dass vieli Sorge gar kei Sorge sind.
Noch enere halbe Ewigkeit hesch Du denn endlich s’Spitol chöne verloh. Dihei hend scho alli sehnsüchtig uf Dich gwartet. Es freut mich bsunders, das ich regelmässig zum z’Morgeesse (oder au chli spöter) bi Eu ihglade wird. So gsehn ich immer wieder wie’s Dir goht und chan Dini chline Fortschritt bewundere. Bi eim vo mim letschte Bsuech hesch Du scho Rumpfbügene wie e grossi Weltmeisterin gmacht und hinder Dim unverzichtbare Nuggi gstrahlet wie es Mariechäferli. Wiiteri Bsüech werd ich voll gnüsse, au bi Dim Mami und Dim Papi bin ich sehr gern, do hesch Du Dir die beste Eltere vo de Welt usgsuecht!
De Weltberüehmt Elvis het bi Dir au scho inneglueget. S´Mami het so freud gha ab dem spezielle Gast, dass sie Dich gad is „Schni - Schna - Schnappi - Kostüm“ verfrachtet het. Viellich sind´s di heisse Songs (love me tender) oder au nur s´Gwändli gsi wo Dis Chöpfli recht schnell het rot werde loh. Bi Dir Dihei lauft recht öbbis.
Sit fasch zwei Wuche bisch Du etz au e grossi Schwöster, Dis Brüederli isch uf d’Welt cho. Zum Glück müend ihr s’Zimmer nid mitenand teile, so chasch immer no die ganz Nacht in ruhe schlofe. Obwohl mit em is Bett goh nämsch es jo nid so gnau, zzzz vo wem Du das au hesch? Bis ihr denn alli eigni Zimmer bruchet isch de Umbau vom Hüüsli sicher fertig. Mit Dim Brüederli chasch etz viel erlebe und ich hoffe au es paar Sache abluege und nohmache. Nu Mia, wenn er tuet brüelle sötsch en amix nid gad uslache…
Zum Schluss will ich allne Danke wo mit Dir so sorgevoll und unkompliziert umgönd. Au jedem wo Dini Eltere so tatkräftig understützet. Entschuldige wot ich mich bi dene wo mit Schwiizerdütsch lese e chli müeh hend (ha mich aber doch so welle usdrucke).
Sooo, aber etz gömmer go Geburtstagschueche esse und Gschenkli uspacke…
Mia - Müüsli, ich wünsch Dir alles alles Liebi, viel Gsundheit und nu s’Bescht!!!
Din Götti
dMia mit ihrem Götti bim erst Kennelerne :)
& de Elvis mit dem Schni-Schna-Schnappi :)
Keine Kommentare:
Kommentar veröffentlichen